Un astrofísico de Harvard suxire que pudo existir vida xusto despois do Big Bang.

Abraham Loeb un astrofísico  Universidade de Harvard en Cambridge, Massachussetts (EUA) suxire nunha investigación teórica publicada en arXiv que a vida podería ter existido xusto despois do Big Bang, a grande explosión que, segundo a teoría xeralmente aceptada, deu orixe ao Universo. Os cálculos do científico apuntan a que a auga líquida, un requisito indispensable para a vida tal e como a coñecemos, puido formarse en planetas rochosos só 15 millóns de anos despois do estalido.

Hoxe en día, a temperatura do fondo cósmico de microondas, o resplandor do Big Bang, é de só 2,7º kelvin, pero nos seus comezos, apunta Loeb, podería terse mantido moito máis quente, a uns 300º kelvin. Nese momento, nos lugares do Universo onde a materia é excepcionalmente densa, poderían terse formado estrelas masivas, de curta vida, que terían enriquecido o ambiente con elementos máis pesados necesarios para facer planetas. Segundo o astrofísico, durante 2 millóns ou 3 millóns de anos todos os planetas rochosos terían sido capaces de manter auga líquida, independentemente da distancia á que se encontrasen da súa estrela. «Todo o Universo foi unha vez unha incubadora para a vida», afirma Loeb na web da revista Nature. Chámao «a época habitable».

Segundo Loeb, nesa época a materia era tan densa que mesmo se a enerxía do baleiro tivese sido un millón de veces máis forte, non tería impedido a formación de estrelas e planetas rochosos, e o xurdimento da vida.

Nature preguntou a varios científicos que lles parece a proposta do seu colega de Harvard, e as respostas varían. Christopher Jarzynski, biofísico da Universidade de Maryland, pon en dúbida que a vida tería podido existir nunha forma uniforme nun Universo cálido. Alexander Vilenkin cosmólogo da Universidade de Tufts en Medford,Massachusetts, asegura que uns poucos millóns de anos é un tempo demasiado curto para producir vida intelixente. Non obstante,Freeman Dyson, físico no Instituto de Estudos Avanzados de Princeton, Nova Jersey, apunta que a vida podería ser máis adaptable do que pensamos.