Unha Lura Xigante Capturada en Xapón

As luras xigantes son unha das criaturas máis misteriosas da Terra.A súa elusiva natureza e o seu inquietante e temible aspecto, unidos ao seu impresionante tamaño, converteron este animal nun mito.

Aínda que a súa existencia é coñecida dende tempos inmemoriables polos mariños, que os confundían con monstros, os encontros son escasos. En ocasións, os seus cadáveres aparecen na costa ou son arrastrados polas redes dalgún barco de pesca e só unha vez, o pasado ano, unhas cámaras de televisión puideron filmar un exemplar vivo nas profundidades mariñas, en augas xaponesas. É precisamente na costa dese país asiático onde unha nova lura xigante apareceu nas redes dun pescador. Aínda que o exemplar, de 4 metros de longo e 150 quilos de peso, foi capturado vivo, morreu pouco despois de ser levado á superficie.

Segundo narran distintos medios xaponeses, o veterano pescador Shigenori Goto tirou da súa rede, botada a 70 metros de profundidade na illa de Sadogashima para pescar unha especie de sollas ou rodaballos, cando apareceu unha captura completamente inesperada. A lura xigante estaba viva e nadaba entre as redes. Por desgracia, morreu pouco despois de que o pescador o sacase da auga.

Hai un ano, a cadea xaponesa NHK e a estadounidense Discovery Channel lograban gravar por primeira vez nas profundidades mariñas a lura xigante, a uns 15 quilómetros ao leste da illa nipoa de Chichijima, a uns 1.000 quilómetros ao sur de Tokyo. Os membros do equipo empregaron un somerxible que captou as imaxes a unha profundidade de 630 metros grazas a unha cámara de alta definición. O animal tiña uns 3 metros de longo, aínda que carecía dos seus dous tentáculos máis prominentes, polo que podía ser aínda maior. A tripulación pasou 400 horas no somerxible para filmar a lura.

Con tres corazóns, unha visión cen veces máis potente que a do ser humano e un cerebro moi desenvolvido, este mítico xigante ocúltase nos abismos mariños, entre os 400 e os 1.500 metros baixo a superficie do mar, onde a presión é moi elevada e a luz do sol practicamente inexistente. Cre que se trata do invertebrado máis grande do mundo, xa que pode chegar a alcanzar uns mil quilogramos de peso e uns 20 metros de lonxitude.